يا طير ياعالى فى السما طز فيك
متفتكرش ربنا مصطفيك
برضك بتاكل دود وللطين تعود
تمص فيه يا حلو ويمص فيك
--------------------------------------------------------------
حاسب من الاحزان وحاسب لها
حاسب من رقابيك من حبلها
راح تنتهى لابد راح تنتهى
مش انتهت احزان من قبلها
--------------------------------------------------------------
وقفت بين شطين على قنطره
الكدب فين والصدق فين يا ترى
محتار ح موت ..... الحوت خرج وقالى
هو الكلام يتقاس بالمسطره
---------------------------------------------------------------
الدنيا اوده كبيره للانتظار
فيها ابن ادم زيه زى الحمار
الهم واحد .... والملل مشترك
ومفيش حمار بيحاول الانتحار
----------------------------------------------------------------
ايوب رماه البين بكل العلل
سبع سنين مرضان وعنده شلل
الصبر طيب ...... صبر ايوب شفاه
بس الاكاده مات بفعل الملل
-----------------------------------------------------------------
نسمة ربيع لكن بتكوى الوشوش
طيور جميله بس من غير عشوش
قلوب بتخفق انما وحدها
هى الحياه كده ............ كلها فى الفاشوش
----------------------------------------------------------------
يالى نصحت الناس بشرب النبيت
مع بنت حلوه ............ وعود وضحك وحديت
مش كنت تنصحهم منين يكسبوا
تمن ده كله؟ ............. والا يمكن نسيت
----------------------------------------------------------------
رقاصه خرسا ورقصه من غير نغم
دنيا ....... يامين يصلحها قبل الندم
ساعتين تهز بوجهها يعنى
يترجرجوا نهديها يعنى نعم
---------------------------------------------------------------
اخطفنى ياللى تحبنى ع الحصان
الدنيا قالت يوم فى ماضى الزمان
اخطفنى ياللى تحبنى ع الفرس
قام خطفها الشيطان
---------------------------------------------------------------
ضريح رخام فيه السعيد اندفن
وحفره فيها الشريد من غير كفن
مريت عليهم قولت ياه للعجب
لاتنين ريحتهم لها نفس العفن
----------------------------------------------------------------
ليه ياحبيبتى ما بينا دايما سفر
ده البعد ذنب كبير لا يغتفر
ليه يا حبيبتى ما بينا دايما بحور
اعدى بحر الاقى غيره اتحفر
-----------------------------------------------------------------
انا كل يوم اسمع ....... فلان عذبوه
اسرح فى بغداد والجزاير واتوه
ما اعجبش م اللى يطيق بجسمه العذاب
واعجب من اللى يطيق يعذب اخوه
عجـــــــــــــــــــــــــــــــــــــــــبى